Акафист

преподобному и богоносному отцу нашему

Iоанну Дамаскину

 

 

         Кондак 1.

 

Избранней цевнице духовной и церковней свирели сладкозвучней пресвитеру Iоанну Дамаскину / пение сие похвальное приносим мы недостойнии / ты же отче преподобне премудре / не престай ко Господу моляся о спасении нас чтущих память твою / и веселием тебе поющих: / Радуйся преподобне Iоанне, вселенныя учителю сладкогласный и премудрый.

 

                            Икос 1.

 

Асинкрит Косма, учитель твой богомудре свидетельствует о тебе, яко еще младу тебе сущу премудростию и разумом превзошел слышаще зовем:

Радуйся Духа Святаго благодатию осененный. / Радуйся учением разум твой умноживый./ Радуйся Божественными и человеческими знаниями обогативыйся./ Радуйся совершенныя премудрости дошедый./ Радуйся учителя твоего премудростию и разумом превосшедый./ Радуйся во учении мудрецы мiра сего удививый./ Радуйся, преподобне Iоанне, вселенныя учителю сладкогласный и премудрый.

 

                            Кондак 2.

 

Видя в творениих Божиих, аки в зерцале премудрость и славу Творца мiра, к Нему духом возносился еси преподобне, усты прославляя Его, в песнех богодухновенных и поя: Аллилуиа.

 

                            Икос 2.

 

Уведев святый Iоанне, яко Лев Исавр, святый иконы от храмов Божиих изметая, огнем сожигает, кланяющихся же сожигает, кланяющихся же тем люте мучительству предает, нача многи епистолии о чести святых икон правоверным посылати, яко подобает им честь и поклонение воздавати; тем же восхвалим богомудраго учителя сице:

Радуйся ревностию Илии Фесфитянина разженный./ Радуйся иконоборческие ереси мощный обличителю./ Радуйся тыя совершенный искоренителю./ Радуйся догматов церковных уяснителю./ Радуйся ученми твоими вся просветивый./ Радуйся яко во всю землю изыде вещание исправлений твоих./ Радуйся, преподобне Iоанне, вселенныя учителю сладкогласный и премудрый.

 

                            Кондак 3.

Силы обличения злочестию своему не терпя злохитрый Лев иконоборец, на тя написа клеветническое послание князю Дамасскому. Той же прочет е, повеле отсещи ти руку десную, яже по усечении повешена бысть на торжищи, посреде Дамаска. Ты же, страдальче, сия претерпевая, воспевал еси Богу: Аллилуиа.

 

Икос 3.

 

Имея веру несумненную, испросил еси преподобне у князя усеченную руку твою, и пад пред иконою Богоматери, приложил еси ю, к суставу ее, моляся из глубины сердечныя, да исцелена будет. По сих же уснув от скорби и болезни, слышал еси от Пречистыя: не скорби прочее ее, здрава тебе есть рука. И возбудився узрел еси, руку свою исцелевши, сему чудяся славим тя сице:

Радуйся верою несумненною сияй./ Радуйся трубо златокованная враги устрашающая./Радуйся скорбь лютую за святыя иконы приявый./ Радуйся усеченныя десницы исцеление от иконы Богоматери получивый./ Радуйся князя Дамасскаго в покаяние приведый./ Радуйся яко имя твое хвально во всем мiре./ Радуйся, преподобне Iоанне, вселенныя учителю сладкогласный и премудрый.

 

                            Кондак 4.

Буря недоумений смущает ны, како возможем восхвалити тя, благоглаголиве по достоянию, ты же яко милостив, воззри точию на усердие наше и научи нас, многогрешных, ощущати величия Божия, во еже пети Ему: Аллилуиа.

 

                            Икос 4.

 

Познав силу десницы Вышняго во исцелении усеченныя руки твоея, отче Iоанне, песни красными воспел еси Преблагословенную: еже о Тебе радуется всякая тварь и подобие, усеченныя руки твоея приложил еси к цельбоносному образу Тоя, тем же со умилением взываем ти сице:

Радуйся органе Духа Святаго вдохновенный;/ Радуйся гусле и псалтире Давида псалмопевца богогласныя./ Радуйся свиреле, утешающая души и сердца верных. Радуйся тимпане, благочестивых чувства услаждаяй./ Радуйся фиале, аромат песни сладкогласныя источаяй./ Радуйся, Деву Пречистую Богородицу песни ангельскими песнословивый./ Радуйся, преподобне Iоанне, вселенныя учителю сладкогласный и премудрый.

 

                            Кондак 5.

 

 Боготечная звезда, был еси богоносе Iоанне указующая путь ко Христу, князь бо Дамасский усещи повелевый ти десницу, таже вси окрест живущие соседи, увидевше тоя от иконы Богоматере исцеление, воспеша Богу: Аллилуиа.

 

                            Икос 5.

 

Видев милость Царицы неба и земли, духоносе Iоанне, до конца жизни твоея, песньми хвалебными Тую прославлял еси в память же бывшаго с тобою чудес онаго, убрусец, имже усеченная десница твоя обвита бе, на главе твоей носил еси; научен выну памятствовати милости Божия на нас воспевающих ти сице:

Радуйся уста медоточивыя богоглаголивыя;/ Радуйся псалмопевцу Давиду в песнех духовных подобяся;/ Радуйся песнописче пречестный и богодухновенный./ Радуйся яко миро благоуханное песни красныя от устен твоих источивый./ Радуйся Церковь Христову песньми изящными украсивый./ Радуйся яко песньми твоими вернии хвалу Богови приносят./ Радуйся, преподобне Iоанне, вселенныя учителю сладкогласный и премудрый.

 

                            Кондак 6.

 

Проповедник велений Христовых быв Iоанне мудре, оставил еси мiрския красоты: богатство, светлость, сладость,- и взем крест твой, вселился еси во обитель Саввы Освященнаго, идеже до конца живота твоего воспевал еси Христу: Аллилуиа.

 

                            Икос 6.

 

Возсиял еси отче преподобне на тверди церковней, яко звезда огнезрачная лучезарная, сладостию писаний и песней твоих насыщая души верных тебе зовущих:

Радуйся песнотворче и вития предивный./ Радуйся светом песнопений твоих Церкви вселенстии сияяй./ Радуйся догматы церковныя писании твоими и песнопении уяснивый./ Радуйся христианом в молитвах и песнех духовных наставниче./ Радуйся яко твоими словесы, христиане Богови беседуют./ Радуйся ликостоянныя песни Пресвятей Троице счинивый благохвальныя./ Радуйся, преподобне Iоанне, вселенныя учителю сладкогласный и премудрый.

 

                            Кондак 7.

 

Хотяй невозбранно духом возноситися горе и горняя выну мудроствовати преподобне, безчисленныя имения твоя раздал еси нищим, рабы свободил еси и благотишие пустынное возлюбив, выну пел еси Богу: Аллилуиа.

 

                            Икос 7.

 

Новаго монаха совершенна обрете в тебе, отче Iоанне, игумен Лавры преподобнаго Саввы сияюще послушанием, смирением и кротостию неизглаголанною, вся повеленная исполняющая отнюдь ни языком, ни умом не прекословяща, научи и нас смирению и кротости приносящих ти хваления сия:

Радуйся имение твое нищим расточивый./ Радуйся Христу нас ради обнищавшему сообнищавый./ Радуйся любителю жития иноческаго истинный./ Радуйся плотское мудрование покоривый духу./ Радуйся о себе попечение всякое отвергий./ Радуйся красото и высото смиренномудрия./ Радуйся, преподобне Iоанне, вселенныя учителю сладкогласный и премудрый.

 

Кондак 8.

 

Странно бе видети Дамасскаго вельможу, иногда славна и превознесенна, ныне же нища и убога. Христа дела на торжище посреде Дамасска послушания ради смиренно продающа кошницы, Богу поюща: Аллилуиа.

 

                            Икос 8.

 

Всем вся был еси во обители преподобне, весь кротость, весь смирение, яко зело дивитися всем и славити тя сице:

Радуйся мiрския мятежныя молвы отбегая./ Радуйся к Христовой тишине притекий./ Радуйся пагубу тщеславия отринувый./Радуйся ангельскому житию поревновавый;/ Радуйся в нищете духовней, Христу подражавый;/ Радуйся образе иноческаго жития совершеннейший./ Радуйся, преподобне Iоанне, вселенныя учителю сладкогласный и премудрый.

 

                            Кондак 9.

 

Вси иноцы Лавры радовахуся яко таков человек славен и всеми знаем бывшия ради его власти и чести и великия ради премудрости своея в толикое смирение и нищету прииде и хваляху Бога песнью: Аллилуиа.

 

                            Икос 9.

 

Витийство земное не возможет, преподобне отче, воспети подолгу яже претерпел еси спасения ради души твоея, во иноческом житии твоем ничтоже бо по воле твоея творил еси, к симже приложил еси труды многие, молитву непрестанную, слезы о гресех жития мимошедшаго, молчание, нищету еще же по достоянию и ублажаем тя сице:

Радуйся всею душею Христови поработивый./ Радуйся смирением воистину высокая стяжавый./ Радуйся нищетою богатство неоскудеваемое приобретый./ Радуйся монашествующих богодухоновенное удобрение./ Радуйся мзду трудов твоих на небесех получивый./ Радуйся благолепием жития сияй./ Радуйся, преподобне Iоанне, вселенныя учителю сладкогласный и премудрый.

 

                            Кондак 10.

 

Спасти хотя от неутешныя скорби брата по духу, уязвленнаго печалию безмерною о смерти брата по плоти, таже возжелав исполнити заповедь Христову о любви, приступил еси, блаженне, заповедь человеческую воспев еже кая  жития сладость и прочая яже до днесь в Церкви певаема бывает с песнью: Аллилуиа.

 

 

                            Икос 10.

 

Стены твердее есть старец твой наставник, егда услыша тя, преподобне, поюща и абие с гневом изгна тя от себе. Умолен же быв от братий, повеле ти: да во всех келлиих очистиши и омыеши вся смрадныя места. Ты же сия слышав возвеселился еси духом и прием чистительныя сосуды и орудия, повеленная сотворил еси со тщанием. О сем ся дея, зовем ти:

Радуйся смирения и кротости образ показавый./ Радуйся от юности добродетелию украсивыйся./ Радуйся яко солнце другое облистал еси в мире./ Радуйся яко в души твоей возсия свет истиннаго Боговедения;/ Радуйся Божественнаго осияния зарю приемый./ Радуйся яко словесы и делы был еси светильник Церкви Христовы./ Радуйся, преподобне Iоанне, вселенныя учителю сладкогласный и премудрый.

 

                            Кондак 11.

 

Пение всеумиленное во вся дни живота твоего, приносил еси всеправедно Христу Спасу, песни красными песнословил еси Чистую Богородицу, Христова Предтечу, таже апостолы, пророки с мученики, преподобными и всех святых чины: в тех ныне водворяяся купно с ними поеши Святей Троице: Аллилуиа.

 

                            Икос 11.

 

Светом неизреченным сияя Владычица мiра, в нощи явися старцу-наставнику Iоаннову глаголюще: вскую заградил еси источник сладкую и изобильную воду источающий; во утрие же призвав старец преподобного рече ему: чадо, послушания Христова, отверзи уста твоя и глаголи яже написа Дух Святый на сердце твоем. Таже вопия ему:

Радуйся источниче вселенную всю сладце напаяяй;/ Радуйся море ересей изсушаяй./ Радуйся кладязю глубокий истиннаго Богословия;/ Радуйся Церковь Христова словесы молитвенными обогативый./ Радуйся Божия Премудрости и благости талант многоусугубивый./ Радуйся премудрости созерцателю предивный./ Радуйся, преподобне Iоанне, вселенныя учителю сладкогласный и премудрый.

 

                            Кондак 12.

 

Благодать Божия от того времени выну исхождаше от устен твоих, блаженне Iоанне, тепле бо обличил еси злоименитыя еретики словесы твоими и догматы, яже счинил еси, поя Христу Богу: Аллилуиа.

 

                            Икос 12.

 

Песни сладкозвучныя яже суть от устен твоих, богомудре, составиша осмогласник, имже даже до днесь Церковь Христова увеселяется, яко духовною цевницею таже, аки сладкою пищею духовною, питаются вернии до ныне и иными многоразличными душеполезными учении от словес твоих хваляще тя сице:

Радуйся Церкви Православныя наказателю и учителю богомудрый./ Радуйся учение Христово песно творивый./ Радуйся глубину Богодухновенных Писаний Божественных добре изуведевый./ Радуйся яко словеса твоя яко стрелы наощрены./ Радуйся пети Богу разумно даже до последних земли научивый./ Радуйся яко во имя твое церкви Божии созидаются./ Радуйся, преподобне Iоанне, вселенныя учителю сладкогласный и премудрый.

 

                            Кондак 13.

О, Iоанне премудре, призри с Небесе на ны низлежащия на земли и прием от любве нашея тебе приносимыя сия песнопения! Умоли Всемилостиваго Бога, да и улучим блаженство вечное, во еже купно с тобою пети Ему: Аллилуиа.

 

 

 

                                               Молитва

преподобному и богоносному отцу нашему

                            Iоанну Дамаскину

 

О, преподобне Iоанне! учителю вселенныя сладкогласный и богомудрый мечем слова Божия поразивый еретическое учение царя иконоборца, ныне в Небесней славе не в иконах, но в зрении самих лиц, кланяешися Христу Господу и Его Пречистей Матери. Тех прилежно моли оградити Церковь Православную от ересей и расколов, от неверия, свободити души наша от обдержащия нас скверны греховныя, и спасти души наша во веки веков: Аминь.

 

                                     

                                      Тропарь, гл.осьмый.

 

Православия наставниче, благочестия учителю и чистоты вселенныя светильниче, монашествующих Богодухновенное удобрение, Iоанне премудре, ученми твоими вся просветил еси, цевнице духовная, моли Христа Бога спастися душам нашим.

 

 

                                      Кондак, гл.тойже.

 

Песнописца и честнаго Богоглагольника, Церкви наказателя и учителя, и врагов сопротивоборца Iоанна воспоим: оружие бо взем, Крест Господень, всю отрази ересей прелесть, и яко теплый предстатель к Богу, всем подает прегрешений прощение.

 

 

Воспроизведено из рукописной тетради, найденной в архиве Казанского собора г.Макарьева (Нижегородская губерния),2006 год.